由於被垃圾留言侵襲,迫不得已在留言內加入驗證功能,不便之處請見諒!

2014年8月13日 星期三

2014 夏末東京、青森、新潟及群馬 - 行程


上次去山陰係趁著阿仔回港後暑假旺季前,今次去東京係趁著阿仔返英國開課前暑假旺季後,時間只相隔兩個月。

不過其實今次係一早計劃好了,去年年尾時已經換了機票,山陰之旅只是後期加入的。


換機票時仲未想到去邊,只打算飛東京,12天時間當然唔會只留在東京,其他地方慢慢再計劃。


問過老公和阿仔意見,老公曾經話想去行奧入瀨溪流,阿仔曾經話想坐五能線,雖然有些景點我和老公已經去過,但亦都想帶阿仔去睇睇,咁第一個目的地就決定去東北青森。


心想去東北都好,希望9月初天氣不會太熱,感覺會好些。


不過青森想去的地方大約只需3日,剩餘其他日子,又去邊好?


睇睇地圖,秋田、山形、仙台這些地方,好多景點都去過。


一路再南下只剩下新潟和群馬。


新潟完全未踏足過,群馬亦只係去過草津,好幾年前睇完頭文字D,好想去會一會秋名山。


所以最後決定東京、青森、新潟及群馬。


交通方面,上東北一定不能缺少JR East Pass,用來來往青森、秋田、新潟及東京。


八戶、奧入瀨溪流、十和田湖、八甲田山等地方似乎駕車會比較方便。

另外由新潟至妙高高原,還有上秋名山及赤城山當然一定要自駕。

最後除了火車會另加兩次租車自駕。



12日的行程如下︰


第一天

香港 > 東京羽田空港 > 東京
住宿︰スーパーホテルLohas東京駅八重洲中央口

第二天
東京 > 軽井沢 > 東京
住宿︰スーパーホテルLohas東京駅八重洲中央口

*最初打算到10幾年無去過的東京迪士尼樂園,不過老公反對,加上還有一天的JR Pass可用,就決定再到軽井沢,今次主要行outlet*

第三天

東京 > 八戸 (取車) > 八食センター > 十和田市現代美術館 > 古牧溫泉
住宿︰星野リゾート 青森屋

第四天

古牧溫泉 > 奧入瀬溪流 > 十和田湖
住宿︰十和田プリンスホテル

*今次會由石ヶ戸步行至銚子大滝,希望順利*

第五天

十和田湖 > 八甲田山 > 弘前 (還車)
住宿︰東橫INN弘前駅前

第六天
弘前 (五能線) > 秋田 > 仙台
住宿︰コンフォートホテル仙台西口

*基本上全日坐火車,早上坐完4個多鐘的五能線,下午如果再由秋田到新潟的話火車時間太長,所以會停一晚仙台,順道可以食牛舌*


第七天

仙台 > 新潟
住宿︰チサンホテル&コンファレンスセンター新潟

第八天

新潟 (取車) > 彌彥神社 > 寺泊 > 妙高高原
住宿︰赤倉溫泉 旅館清風莊


第九天
妙高高原 > 榛名湖 > 榛名山 > 伊香保おもちゃと人形自動車博物館 > 伊香保
住宿︰伊香保溫泉ホテル 木暮

第十天
伊香保 > 赤城山 > 越後湯沢 (還車)
住宿︰越後湯沢HATAGO井仙


第十一天
越後湯沢 > 東京 > 品川
住宿︰東橫INN品川駅高輪口

*回到東京再決定餘下時間去那些地方*


第十二天

品川 > 東京羽田空港 > 香港

3個星期後出發....



31 則留言:

  1. 伊香保木暮幾正㗎~~~~記住食温泉饅頭O(∩_∩)O

    回覆刪除
    回覆
    1. 一早已經睇中依間,不過價錢都唔平,全程最貴係佢,我見你都住過

      刪除
    2. 物有所值。仲貴過青森屋? 我仲估逢星野集團嘅都必然貴絕

      刪除
    3. 星野集團都有唔同級數嘅酒店,星系及界系列嗰D就係貴嘢,青森屋只係一般價錢,你可以上佢官網睇吓,我今次book咗佢嘅新客室食夕自助餐一個人都係13,XXXyen,價錢算OK

      反而伊香保睇得上眼嘅全部都唔平,可能名氣大,木暮我都只係住最平嘅和室

      刪除
    4. 我都會有平有貴咁住下,有時太晏先到埗,或者响附近行景點,都未必會住太貴。

      但我想住嗰啲星野酒店都天價,唔捨得╮(╯_╰)╭

      刪除
    5. 我就視乎幾多個人去,兩個人豪少少都得,會揀D風呂付客室,三個人就普普通通唔太差就可以,始終x3個價同x2個價差好多,要睇餸食飯嘛...:))

      刪除
    6. 哈哈,你哋三個人一個單位梗係睇餸食飯,我如果同兩三個朋友去,實揀貴房,因為越多人每個人就越平

      刪除
  2. 請問下關於租車, 妳地通常係邊間租? 點決定租咩車款夠用? 我睇過d租車公司, 7人車建議坐4人+2-3行李

    回覆刪除
    回覆
    1. 視乎响日本邊度,北海道會、沖繩較多選擇,之前好多時會幫襯Tocoo,不過宜家價錢貴咗,5月東京租咗Toyota,今次兩次都一樣會租Toyota

      係架...7人車要留番最後排放行,5個人都可以,4個人會舒服D

      刪除
  3. 原來去青森、新潟及群馬 , 我全部都未去過....

    回覆刪除
    回覆
    1. 基本上你一年兩次,暑假有唔少選擇,冬天你會喜歡去北海道多D,其實新潟都有唔少滑雪場,不過聖誕應該D雪未夠厚

      刪除
  4. 12日...... 我可唔可以坐車尾箱 >:)

    回覆刪除
    回覆
    1. 唔得...要坐緊係坐後面座位喇...車尾箱要嚟放行李嘛..:))

      BTW, 你今年都好似會再去東北喎...

      刪除
    2. 係啊, 不過仲未有心情plan, 哈 >:)

      刪除
  5. 碓氷峠同妙義山又點可以缺少~

    回覆刪除
    回覆
    1. 可以去都想去埋,可惜一來唔太順路,二來唔夠時間,下次有機會先

      刪除
    2. 想當年唔識死無 CarNavi 都去咗唔少地方朝聖.
      最深印象始終係いろは坂

      刪除
    3. 我又唔係特別要去朝聖,見嗰頭未去過咪去吓

      刪除
  6. 終於見到你去榛名山喇, 好似講咗都好耐, 一講起榛名山就諗起"寶媽同寶爸" 因為我都係睇佢個 blog 跟住去, 唔知佢有冇搬過來?

    回覆刪除
    回覆
    1. 我都係因為寶媽而認識榛名山的,早兩個月睇過佢地未搬過嚟,而家就唔知了

      刪除
    2. 榛名山一直都响我個 to go list裏面排緊隊,宜家終於輪到,我以前都有睇"寶媽同寶爸"個blog,反而我唔記得佢哋去過,唔覺佢有搬過來

      刪除
    3. 榛名湖幾靚架~
      伊香保石段街都出場過唔少次, 豆腐店同香港架 86都搬咗去自動車博物館.

      刪除
    4. 基本上上榛名山都會經榛名湖,伊香保當然出名喇,就係知道個豆腐店同86搬咗去自動車博物館所以一定要去囉...

      刪除
  7. 去東北好吖!我喜歡 :D 青森屋我恨住咗好耐,最想睇佢夜晚嘅表演,但當初睇佢啲住宿 plan 時唔係好明,咁唯有等你嘅介紹啦!

    回覆刪除
    回覆
    1. 其實佢個住宿plan主要分兩種夕食︰みちのく祭りや (邊食邊睇青森四大夏祭表演) 及自助餐,不過我今次揀咗自助餐因為みちのく祭りや個御膳唔係好啱食,另外佢每晚响大堂都有表演包括津輕三味線,仲有佢嘅露天風呂浮湯都好特別,我响網上唔多見香港人住,台灣人就唔少

      返嚟一定詳盡介紹

      刪除
    2. 唔多香港人住咩?但些我見佢係旅行團專去的洒店,當初亦有考慮過呢個問題,怕喺浮湯見到太多自己人,所以冇揀到呢!

      刪除
    3. 乜有旅行團去住架...真係唔知喎,我搜尋遊記時見好多都係台灣嘅

      算喇..放完暑假應該無乜團

      刪除
    4. 唔記得o係邊間旅行社的宣傳海報見過係住呢間的,等我經過開再睇睇先
      不過你放完暑假先去就真係應該會少好多團o既……係呢,咁幾時出發 ?

      刪除
    5. 我search過係縱X遊,不過我見佢暫時D團係10月出發,應該係去睇紅葉

      9月初出發,仲有兩個幾禮拜

      刪除
  8. 3J家庭你們好,

    SeeWide特搜網是一個全新互動生活分享平台,集齊各地遊山玩水好去處及講玩、講食、講扮靚、講生活,讓大家分享不同的生活體驗。

    你的網誌十分切合我們網站主題,內容及相片也很有質素,請問可否讓我們轉載網誌內的相片及內容?(會注明出處及不作改動)

    我們的目的,是盡力網羅優質的相片及內容,建立一個包含豐富生活資訊的玩樂休閒分享平台,讓一眾志同道合的網友可更輕易獲得寶貴的參考資料。現階段,SeeWide 已擁有超過十萬篇生活攻略,瀏覽量亦超過數十萬。

    希望你能成為我們平台的一份子,助我們更有效地集結各樣不同的好玩好食生活資訊!

    另外,我們亦設有「稿費」制度,透過發表文章所累積的本地瀏覽量,即可兌換稿費!

    而我們亦可以你的名義,將稿費捐到香港宣明會,或你指定的慈善機構
    詳情可參閱:http://www.seewide.com/space.php?do=help&essay_id=22#001

    如有任何查詢, 歡迎電郵至: info@seewide.com

    回覆刪除