由於被垃圾留言侵襲,迫不得已在留言內加入驗證功能,不便之處請見諒!

2014年9月19日 星期五

2014 夏末東京、茨城、青森、新潟、群馬 - 濃縮版


12日的旅程好快又完結了,原本這篇只打算在寫遊記前先作個簡單報告及列出詳細行程,料不到竟然越寫越多,而且又加上相片,變成了遊記的濃縮版。

首先是天氣,儘管出發前已略知大概,但仍然會有變數,不過總算不錯,9成日子天晴,某些時間還是陽光普照,雖然其間曾經有颱風在日本外圍掠過,但對我所到之處沒太大影響,非常幸運。

另外,今次除了東京外,11日內總共踏足了8個縣,計有茨城、青森、秋田、宮城、新潟、群馬、長野及神奈川,破了以往記錄。

報告及詳細行程如下︰

第一天

香港 > 東京羽田空港 > 東京
住宿︰スーパーホテルLohas東京駅八重洲中央口

由於航班遲了起飛 (在機艙坐了半個多小時才開動),到達酒店已經3點多,check-in完到東京駅買JR Pass及預定所有火車班次,然後在駅內周圍逛逛,未夠6點已經食晚飯,飯後到丸の內口那邊看看晚上的東京駅。



第二天
東京 > 上野 > 水戸 (偕樂園) > 上野 > 東京スカイツリー > 東京
住宿︰スーパーホテルLohas東京駅八重洲中央口

出發前兩日才改行程,把原來軽井沢搬到第11天,利用餘下的一日Pass在上野乘特急車去茨城縣水戸的偕樂園,日本3大名園之一獨欠此園未到,但3大園之中個人感覺此園最失色,可能要到梅花季節景色為之最好。


第4次到Sky Tree (第一次還未開),主要是帶阿仔來,雖然天色有雲不太好,但不需排隊便可即買票即上觀景台,還是上去了,上次看夜景,今次看日景,相信不會再上第3次了。


第三天
東京 > 八戸 (取車) > 八食センター > 十和田市現代美術館 > 古牧溫泉
住宿︰星野リゾート 青森屋

11點多到達八戸,取車後去八食市場七厘村食海鮮燒烤。


之後到十和田市現代美術館,碰上有祭典封路,兜了不少圈才到達,館外道路兩旁還擺放不少攤檔,我們只參觀了外面的展品,然後便到入住的旅館青森屋。



在旅館除了浸獨特的浮湯外,晚上還有表演,夕食自助餐尚算不錯,感覺比上次入住同集團的奧入瀬溪流酒店的好。




第四天
古牧溫泉 > 奧入瀬溪流 (湧水館、溪流館) > 十和田湖 (瞰湖台、乙女像、十和田神社、荷峠展望台)
住宿︰十和田プリンスホテル

早上離開青森屋後途經奧入瀬湧水館及溪流館,再把車停泊在銚子大滝,然後乘巴士到石ヶ戸,開始今個旅程的第一個焦點 - 奧入瀬溪流散策。健行一向是我的弱項,好在整段路坡幅不大,其間只在某些拍照位停了一會,影了幾張照片再繼續,沒有休息足足花了3小時行到銚子大滝。其實行了約2/3路程時我已開始感到體力不支,好想放棄,最後當然仍要硬著頭皮行到終點,到達銚子大滝時簡直有點虛脫,我講過不會再有第二次。





在子の口食完午飯,去了兩個觀湖台及十和田湖邉的乙女像,然後到酒店。




 酒店位於西面湖側,走過酒店外一片綠油油草地便是湖邊,環境不錯,感覺舒服。



第五天
十和田湖 > 滝ノ沢展望 > 御鼻部山 > 睡蓮沼 > 地獄沼 > 酸ヶ湯溫泉 > 岩木山展望台 > 八甲田山 > 弘前 (蘋果園、弘前城、市內觀光、還車)
住宿︰東橫INN弘前駅前

離開酒店又再去了兩個分別是滝ノ沢展望台及御鼻部山的觀湖台,接著到八甲田山經過睡蓮沼、地獄沼、酸ヶの湯溫泉、岩木山展望台,然後坐ropeway到八甲田山頂,行了30分的遊步道。






在山頂食完午飯便往弘前,經過城ヶ倉大橋,弘前市去了弘前市蘋果公園、弘前城及在弘前市內觀光,然後到酒店check-in再去還車。






第六天
弘前 (五能線) > 秋田 > 仙台
住宿︰コンフォートホテル仙台西口

今日早上的行程是第二焦點,乘坐五能線由弘前至秋田,雖然曾經自駕過這段路,但火車跟自駕感覺完全不同,途中在千疊敷停留了15分鐘,可以下車走過去近距離欣賞,晴朗的天氣,日本海景色盡收眼底,接近5小時的火車旅程很快便過去了。




到達秋田在駅內食了名物比內地鷄親子丼後又再繼續乘新幹線到仙台,晚餐當然食仙台牛舌,在仙台渡過了中秋夜。





朝早一早乘新幹線到新潟,沒有自駕關係只打算在駅附近逛逛,把行李寄存在酒店便乘巴士到附近的AEON Mall逛商場。


食完午飯到超市買了些東西便回酒店取房,然後在駅內流連,晚飯去了食新潟名物かつ丼,加了タレ汁的炸豬扒飯,不錯。


第八天
新潟 (取車) > 朱鷺メッセ > 彌彥山 > 彌彥神社 > 寺泊 (寺泊魚の市場通) > 妙高高原 (いもり池、苖名滝)
住宿︰赤倉溫泉 旅館清風莊

因為安排宅急便花多了些時間(一直無留意原來有重量限制,由於過重要再整理過才可託運),比原定遲了少許食早餐。迅速食畢退房便到租車公司取車。到達時沒有客人,但正當辦理租車手續時,後面突然多了許多人,後來職員也沒太多時間核對車身,只想我們盡快離開。

第一站去了朱鷺メッセ的Befcoばかうけ展望台,從高處俯瞰新潟市。接著去彌彥山及彌彥神社,然後去寺泊魚の市場通 (魚のアメ橫) 食午飯。







飯後前往妙高高原,最初天氣還好,後來天色開始轉差。突然經歷一場傾盤大雨,之後又有短暫陽光,天氣極不隠定。到達妙高高原天色陰暗,好在大部份時間都沒有落雨。妙高山給雲遮蓋了看不到,不過也去了兩個景點分別是いもり池及苖名滝。



好久沒住過古舊的小型溫泉旅館,清風莊的自家式料理夕食,簡單而豪華、美味,加上健談的旅館老闆娘態度親切,感覺很好。



第九天
妙高高原 > 榛名湖 > 榛名山 > 高根展望台 > 伊香保おもちゃと人形自動車博物館 > 水沢觀音堂 > 伊香保溫泉
住宿︰伊香保溫泉ホテル 木暮


今天將會離開新潟縣前往群馬縣。天色依然陰暗,途中亦遇上雨。到達榛名湖時慶幸無雨,但景色當然大打折扣,殘念。


駛過秋名山賽道去食水沢烏冬,感覺普普通通,在途中的高根展望台影下五連髮夾彎。



飯後到伊香保おもちゃと人形自動車博物館參觀,原來小小的博物館收藏了不少展品,當中最期待的一定是頭文字D的藤原豆腐店及AE86,不太仔細參觀也花了一個半小時。



下午天色感覺比早上好些,間中還有藍天。去過水沢觀音堂後,時間已經是下午4點。


由於不想太怱忙遊覽伊香保石段街又暫不想到旅館,趁這段時間又再次到榛名山及榛名湖走一轉,這次還坐吊車上山頂。由伊香保到榛名山這段路竟然發現了一樣很特別有趣的東西,留待詳細遊記再敍述。



木暮是間大型溫泉酒店,內裏寬敞空間感很大,浴場內風呂也不少,裏裏外外加起有7個,逐個浸也頗需時,食事尚算不錯。


第十天
伊香保溫泉 > 伊香保石段街 > 赤城山 (大沼、覚滿淵、小沼) > 越後湯沢 (還車)
住宿︰越後湯沢HATAGO井仙

經過昨天的陰天有雨,今日大放天晴。離開酒店去行伊香保石段街,斷斷續續走上365段的梯級又不算太吃力。




完成後見時間還充裕,加上大好天氣,所以又再一次到榛名山及榛名湖拍照補飛,同一段路兩日內足足行了5次計有25連,又一記錄。




接著去另一邊的赤城山,同樣是漫畫頭文字D的賽道,髮夾彎比榛名山的更多,山上景點主要是由火山形成的3個沼︰大沼、覚滿淵及小沼。





完成了赤城山的行程後便離開群馬縣,再次返回新潟縣,在越後湯沢還車。旅館HATAGO井仙位處車站對面,過條馬路便是,而還車地點正正在旅館隔離,十分方便。外形古舊但內裏設計具有特色,魚沼cuisine料理的食事有驚喜,整體感覺很不錯。


第十一天
越後湯沢 > 軽井沢 > 東京 > 品川
住宿︰東橫INN品川駅高輪口

離開越後湯沢前在駅內逛了一會CoCoLo湯沢,然後開始踏上歸途。


由越後湯沢往軽井沢只需約一小時,跟東京往差不多。星期六加3連休又再現車龍,不過感覺比上次GW5連休好些。趕緊食完午飯便要把握時間在oulet血拼。假期不只大人及小孩多,連狗隻寵物都多,還不少在草地上自由走動。遠處看到有嬰兒車的物體,要差不多來到面前才知道裏面究竟是小孩或是狗隻,相信這種景像沒大可能在香港看到。


血拼完也是時候回東京,check-in完隨便在品川駅附近食了晚飯便返回酒店收拾行李。

第十二天
品川 > 橫浜 (MM21) > 品川 > 東京羽田空港 > 香港

昨晚想了很久也未有頭緒今早去那裏好,早上起床時突然想到去橫浜。由品川去橫浜只需15分鐘車程,忘記了去MM21是需要在橫浜轉みなとみらい線,在橫浜駅兜兜轉轉才想起,在MM21逛了一會食完午飯便返回品川到酒店取回行李到羽田機場。


原來羽田機場在假期時是一個不錯的消閒地方,不少日本人一家大小到機場食買看飛機,好不熱鬧。


以為會順利準時起飛,料不到在登機時間到時才通知航班要延遲一個小時,激氣!  好在真的一小時後便能登機,最後比原定時間遲了半個鐘多些到達香港,12日開心旅程正式完結。

總結今個旅程整體大致順利,亦能盡興。

既然出了這個濃縮版,詳細遊記亦不用著急了,總之不日上載,速度相信一定不會好像上兩次的快,請耐心等候。

24 則留言:

  1. :-bd 我好快睇咗兩次。我見D相靚咗好多喎,尤其瀑布相,係你自已定J仔影(你話J先生手震影唔到)?

    你自己定行程,都整個健行三小時,仲有365樓梯咁勇敢?九月仲熱,好辛苦喎。:))
    宅急便一件可以30kg,你都過咗咩?
    MM21可以由桜木町駅行過去架?
    後段頭文字D行程梗係為J仔度身定做。:))


    回覆刪除
    回覆
    1. 個幾張瀑布相係阿仔部機影嘅,其實佢曾經教過我點影,不過唔記得了,今次同佢一齊再教過,原來我用開部DC仔都影到依個效果。

      奧入瀬幾年前去過一次,不過只係揸車停低影相,見沿住溪流行嘅路都幾平坦,應該唔難行,可能我平時少運動加上年紀大,原來不停咁行兩三個鐘都幾吃力,所以無下次。石段街365級樓梯係斬件式,5、6、7級、10級8級就會停一停,兩旁又會有商店,停低影吓相睇吓嘢都可以回一回氣,唔算好辛苦。

      九月已經無7、8月咁熱,尤其我哋上青森,日頭都係二十幾度,去到高地仲涼,係有太陽曬住先比較熱,整體上都算舒服,只係响東京先最熱,不過最後返到東京已經無第一日去到咁熱了。

      之前試過幾次宅急便都無磅重,所以完全無諗過有重量限制,今次由新潟寄個29吋喼返東京,因為响AEON Mall 買咗袋新潟米,又加埋响青森買咗蘋果汁,所以個喼特別重,可能酒店職員見咁重先要磅,佢話最重去到25kg,當時個喼有29kg,最終唯有攞番起D米同飲品減輕重量。

      橫浜係即慶去,已經唔太記得可以點行過去。

      頭文字D行程都唔係特別為阿仔嘅,老公都like架,要知揸車係老公,佢先feel到揸嗰段路嘅感覺。

      刪除
    2. 哈,怪不得瀑布相特別唔同咁。

      記錯,真係25kg:160サイズ 160cm以内 25kgまで

      刪除
  2. 呢個旅程好多湖光山色o既郊外相,我喜歡呀 ! 8->
    最喜歡還是睇東北部份 ~ 八食市場想起都流口水,一定要搵機會去食多次 ! =P~ 五能線沿途風光又靚又舒服,雖然要 5 個小時的車程,但一點也不覺得辛苦的 :-bd 蘋果公園及仙台牛舌…樣樣都好難忘呀 !! ~X(

    回覆刪除
    回覆
    1. 有錢有時間先得o架 ! ::mm1673 況且旅行目標地方太多,有排排呀 !

      刪除
    2. 東北唔錯,又多大自然景色,不過今次沿途都無碰見香港人,青森屋都只係見到三兩個台灣人,唔知係因為過咗暑假旺季定係香港人到宜家都仲未完全接受番東北呢....

      刪除
    3. CK, 話時話,做乜你個九州遊記無哂影::_346

      刪除
    4. ck, 你買少幾箱精品都飛到幾轉啦, 哈! >:)

      刪除
    5. "ck, 你買少幾箱精品都飛到幾轉啦" x 2 =))

      刪除
    6. "ck, 你買少幾箱精品都飛到幾轉啦" x3 =))

      刪除
    7. 大家太唔了解我喇,我夠知「買少幾箱精品都飛到幾轉」啦,但問題係:我仲未戒得甩嘛 !! ::_361

      刪除
    8. 3J:想唔提唔提個九州遊記、由得佢唔多覺都唔得添 ::_359
      實情係我搞得掂屋企部電腦打字o黎,公司電腦又 short o左,手機版又回應唔到 ( 個 accound 突然唔同o左,點改都改唔返 ck 鼠個名 ),加上9 月比較忙、又未揀好相……所以呢……總結為之曰 ~ 懶 ! =))

      刪除
    9. 我都係啊, 手機版回應唔到!!

      刪除
  3. 9日天晴好羨慕啊!! 八甲田山頂步道景色ok嗎? 我上次唔夠時間無得行!! 奧入瀨好值得花多啲時間徒步, 景色真係好靚!! 有無係髮夾彎飄移? 哈哈!!

    回覆刪除
    回覆
    1. 係9成天晴,12日內加埋大約有1日有落雨

      八甲田山頂只係揀咗30分鐘嘅遊步道course,無揀60分鐘,因為仲未有紅葉,不過天氣好都唔錯

      奧入瀬秋天應該會靚D,但係自問體力有限,下次去都係揸車停低影完相走人算了

      飄移? 想無命返香港咩...我哋揸嗰架都唔係AE86

      刪除
    2. 去到唔係個個都會拓海上身咩, 哈哈!! >:)

      刪除
    3. 就算拓海上身都飄唔起呀...=))

      刪除
    4. 應該係飄咗落山先啱....跟住就飄咗上天堂::mm1566

      刪除
  4. 頭D呀 !!!! ::cc7124 ::_343 ::_1558
    嗰度有冇頭D 野賣 ? AE86 車仔? 豆腐店場景模型?

    回覆刪除
    回覆
    1. 館內有間shop買玩具,車仔阿仔搵過唔見有,一盒盒唔同車款嘅模型有好多

      刪除
  5. 整個行程都叫順利, 天氣都唔太差....去玩確係最開心....我都希望有朝一日可以自駕遊

    回覆刪除