由於被垃圾留言侵襲,迫不得已在留言內加入驗證功能,不便之處請見諒!

2017年6月26日 星期一

2017 夏之北歐四國、午夜太陽、冰川峽灣之旅


北歐四國 (挪威、芬蘭、丹麥及瑞典) 一直都响我嘅歐洲 to-go list 裏排緊隊

只係依兩年去歐洲夾唔到適合時間

個人最想夏天去北歐

去睇午夜太陽,欣賞峽灣及冰川景色

加上氣溫適中,感覺舒服

好開心終於今年可以成行了

今次去北歐仍然係選擇跟旅行團,相信只有旅行團先可以滿足我能夠用最少嘅日子去最多嘅地方,不幸今次响報團過程中發生咗件令人十分激氣的事情,令我幾乎去唔成,不吐不快。

話說今次北歐遊响年初已決定今年要實行,3月時已經開始留意各大旅行社的網頁,其實13天午夜太陽及冰川峽灣的團種只有3間做長線的旅行社有辦,分別係「K」、「J」及「C」 (有跟過團的人大致上都估到),行程大同小異價錢亦差唔多,而我主要考慮嘅係出發日期。當時只有「K」及「J」有我想要日子 (兩個相差3日),而「J」比「K」更啱。兩間先前都有參加過,算是不過不失喇。

當「J」一開團時已經表示所有團「已成團」,雖然4月初報名時都再問過旅行社是否真的能夠成團,但職員表示好有信心,咁我亦都唔再懷疑。

誰不知兩個月後便出事了,在出發前唔夠一個月時「J」旅行社竟然通知我所報的團因為人數不足要取消,一是改另一個出發日子,二是退回訂金加補償,聽到後即愕咗一然,監於當時响公司唔能夠太激動,但我亦毫不客氣在電話中抱怨了幾句,然後話要諗諗再回覆。由於前後出發相差一個星期,但我和老公嘅假期一早已經定咗,相差兩三日都仲可以改,但一個星期就肯定唔得。

一肚氣收線後第一時間上「K」旅行社網頁睇睇,先前啱心水嘅出發日子尚餘少量名額,為免夜長夢多,放工即上去報名,順利報咗名後終於叫做安心,然後再回覆「J」旅行社隔兩日後上去退回訂金及取補償 (每人一千元),當然上到去時我嘅態度非常不滿,既然未有十足把握就唔好口輕輕話已成團,簡直豈有此理,痛駡了一頓後才稍為平息我心中怒火,雖然我唔係經常跟團,但以往從未遇過這種情況 (可能係好彩),好在有另一間旅行社補上,否則今次北歐遊可能會告吹。

今個星期尾出發..

13 則留言:

  1. 原來[J]都咁衰架, 上述情況我只在[W]試過一次
    唔好激氣啦, 開開心心等出發, 祝旅途愉快!

    回覆刪除
    回覆
    1. 其實如果當初我報團時佢表示未成團的話,我係絕對唔會介意唔成團,我覺得係佢做生意嘅手法囉,一早表示已成團的話可以吸引多D人報名,只係今次估計錯誤,又諗住就算唔成團,D客通常都肯改日子又或者轉團,可惜遇著我哋唔肯改又唔肯轉咪要賠錢俾我哋,抵死囉...

      氣已經一早激完了,我宜家都係開開心心等出發,多謝!

      刪除
    2. 以前跟[康X]經常發生, 後來轉咗[E]就好少少。
      近幾年除咗返大陸外, 都冇跟過旅行團, 乜宜家有錢賠架?
      Anyway, 預祝旅途愉快, 玩得開心D

      刪除
    3. 我宜家都係去D長線遊先跟團

      根據旅遊業議會指引,如果報名時係已成團或保證出發的話,但最後要取消,旅行社須向該等團友賠償15%之團費,以港幣1,000元為上限

      多謝!

      刪除
    4. 咁間旅行社對呢果團都好有信心成團喎XD

      刪除
    5. 我報名時佢哋話根據以往情況好有信心可以成團,其實我真係無懷疑過,因為前年我跟「K」旅行社去西葡,出發前4個幾月去問已經話成咗團,後來我隔咗個星期先去報名,點知到開茶會時先知原來我哋係1號同2號,即係一個客都未收就知一定可以成團,最後嗰團都有三十幾人,你都咪話間旅行社無料到,所以今次都相信「J」應該可以,點知就出咗事

      刪除
  2. 跟團真的有少許麻煩, 聽人講有時要改假期, 尤其淡季跟團, 有時話冇機位, 有時話冇酒店....Anyway, 玩得開心d.....

    回覆刪除
    回覆
    1. 依D地方唔跟團真係唔識plan,又要坐內陸機、船、火車,如果要自己book的話,真係頭都痛,加上假期有限,其實跟團有好有唔好嘅...

      多謝! 你都玩得開心D呀!

      刪除
  3. 有錢賠, 你已經好好彩.
    任何團比得人報名都係"已成團"架啦............. 你唔係今日先知真相.....

    回覆刪除
    回覆
    1. 都唔係架,我見有其他團真係未夠人係唔會話已成團,我試過出發前一個星期先通知你,後來我好快搵到另一間,依頭去A旅行社退錢,轉頭就去隔離B旅行社報名,亦試過响淡季成團得12個人都照出團,情願賺少D好過D領隊無嘢做

      刪除
    2. 不過 Big 3 都咁, 估唔到.
      可能有另一 group 轉走咗先唔夠人.

      刪除
    3. 其實我上去退錢時有問過原因,因為响電話度佢只係講取消,最初個職員竟然話睇電腦睇唔到唔知原因,跟住我火都嚟埋,後來另一個高級D嘅嚟招呼我,再睇過先話我知因為有幾個客嘅簽證有問題,令到人數唔夠成唔到團,我就唔係太信,如果係香港人攞嘅係特區護照根本唔需要簽證,除非係大陸客囉...

      或者係今年個情況唔同舊年或以往,加上又未到暑假,可能真係少人報名

      刪除
  4. 我都有十幾年無跟過團,以前跟團都係返國內,他日回國內旅遊都會跟團。

    回覆刪除