一早5點幾起身
7點幾去到機場
可能暑假仲未正式開始
未算好多人
老公例牌去CX Lounge食早餐
我同阿仔去咗foodcourt食
當然又係翠華喇..
食完去閘口等上機
又係坐CX
原本有諗過坐星航
但星航無論係package價錢，同埋酒店價錢都比CX貴少少
加上CX Holiday响網上即時check到有無機位及房間
跟手就做埋booking方便得多
而且航班時間又啱心水
雖然服務唔及星航，算喇...
準時起飛
今次飛機餐係早餐，一般喇...
12點幾到咗新加坡樟宜機場
都唔少人排隊過關
好在我哋坐得前，快少少落機
過關連攞埋行李都用咗20分鐘
攞完行李去搭的士
有牌寫住出市區大約幾錢，不過我哋唔係去City
要留意新加坡的士有幾種，價錢有分別架
好快上咗的士
天氣唔錯喎....藍天白雲
前排的霧霾問題無哂...
途中見到Singapore Flyer 同埋 Marina Bay Sands
聽日會嚟依度
半個鐘便嚟到Sentosa Island (聖淘沙島)，車費S$22
我哋會連泊3晚The Sentosa Resort and Spa
一間5星渡假酒店
check-in 時未夠兩點﹐都俾到房
開門後有個玄關
再推門入去便是睡房
依間係價錢最平的Deluxe Room﹐面積有36m²
俾咗張King Size 嘅床，仲未加床
因為CX個package係3日2晚
我哋住多晚要俾多接近3千蚊(3人)
有少少舊，不過都幾乾淨
個浴室都幾大
淋浴間
隔離係洗手間
仲有浴缸，不過無用過
有免費水提供，每日一人一樽
浴室用品齊備
房間窗外景色
其實島上仲有幾間酒店
最新嘅有Resort World即係USS裏面嗰幾間
不過聽聞強國人較喜歡入住
另外仲有嘅一係價錢貴，一係無免費上網
研究咗一輪終於揀咗依間
雖然係舊咗DD
但勝在有free wifi及唔覺有強國人 (住咗幾日都唔見)
價錢又唔算好貴
喜歡佢樓層唔高好有resort feel囉...
執好行李內的物品後出發開始行程
經過酒店內的泳池
酒店提供免費shuttle bus去Vivo City
(Harbour Front MRT Station)
半小時一班，可以轉地鐵去其他地區
另外仲有shuttle bus去Orchard Road，兩小時一班
如果去島嘅其他地區
可以响酒門口坐No.3 Sentosa Island Bus
我哋先坐shuttle bus去Vivo City食下午茶
去咗B2亞坤食著名咖央多士
我和阿仔要咗Ice Tea (凍奶茶) S$2.2
茶味無香港奶茶咁濃
老公要飲熱奶茶S$1.5
再加兩件Kaya Toast with Butter (咖央牛油多士)
和一件Kaya Peanut Toast (咖央花生醬多士)，各S$2.0
味道都OK
食完多士，老公唔係咁飽，又去咗另一邊food court揾嘢食
食咗碗魚湯米粉
見到我最喜愛的刨冰Red Ruby
20幾年前嚟新加坡好喜歡食佢
刨冰上加上綠色黃色的西米﹐尤其最愛食紅色一粒粒叫Red Ruby
外面紅色少許煙韌，裏面係白色好似馬蹄咁爽口
其實無咩味，不過就好喜歡嗰種口感
刨冰再淋上椰汁，熱天食一流
可惜香港無得食
不知不覺食完下午茶都4點幾，要入番島玩了
(續...)
沒有留言:
張貼留言